పారిశుద్ధ్య కార్మికులకు అల్పాహారం

లయన్స్ క్లబ్ ఆఫ్ హైదరాబాద్ కుషాయిగూడ ఆధ్వర్యంలో సేవా కార్యక్రమం

కుషాయిగూడ :

సమాజ పరిశుభ్రత కోసం నిరంతరం శ్రమిస్తున్న మున్సిపల్ పారిశుద్ధ్య కార్మికులకు లయన్స్ క్లబ్ ఆఫ్ హైదరాబాద్ కుషాయిగూడ ఆధ్వర్యంలో అల్పాహారం అందజేశారు. హంగర్ రిలీఫ్ (ఆకలి నివారణ) కార్యక్రమంలో భాగంగా నిర్వహించిన ఈ సేవా కార్యక్రమం ప్రశాంత్‌నగర్‌లోని లయన్స్ ఇంటర్నేషనల్ జిల్లా 320-హెచ్ జిల్లా గవర్నర్ లయన్ అశోక్ కుమార్ స్వైన్ పీఎంజేఎఫ్ నివాసం వద్ద జరిగింది.

ఈ సందర్భంగా జిల్లా గవర్నర్ లయన్ అశోక్ కుమార్ స్వైన్ మాట్లాడుతూ, పారిశుద్ధ్య కార్మికులు సమాజానికి అందిస్తున్న సేవలు అమూల్యమైనవని కొనియాడారు. ప్రజలు నిద్రలేచేలోపే తమ విధులను పూర్తి చేసి పరిసరాలను పరిశుభ్రంగా ఉంచేందుకు వారు చేస్తున్న కృషి అభినందనీయమని అన్నారు. ముఖ్యంగా కరోనా మహమ్మారి సమయంలో ప్రాణాలను సైతం లెక్కచేయకుండా అందించిన సేవలు చిరస్మరణీయమని పేర్కొన్నారు. వారి సేవలను ప్రతి ఒక్కరూ గుర్తించి గౌరవించాలని సూచించారు.

సమాజం రుణపడి ఉంటుంది

కుషాయిగూడ లయన్స్ హాస్పిటల్ ట్రస్ట్ చైర్మన్ లయన్ కొత్త రామారావు మాట్లాడుతూ, నగర పరిశుభ్రత కోసం ప్రతిరోజూ కష్టపడుతున్న పారిశుద్ధ్య కార్మికులకు సమాజం ఎల్లప్పుడూ రుణపడి ఉంటుందని అన్నారు. వారి సేవలు ప్రజారోగ్య పరిరక్షణలో కీలక పాత్ర పోషిస్తున్నాయని తెలిపారు.

ఆరోగ్య శిబిరాలు నిర్వహిస్తాం

లయన్ కొత్తపల్లి రాంబాబు పీఎంజేఎఫ్, జిల్లా కార్యదర్శి – గ్లోబల్ కాజెస్ మాట్లాడుతూ, ఈ సేవా కార్యక్రమాన్ని విజయవంతంగా నిర్వహించిన క్లబ్ అధ్యక్షుడు, కార్యదర్శి, కోశాధికారిని అభినందించారు. భవిష్యత్తులో పారిశుద్ధ్య కార్మికుల కోసం ప్రత్యేకంగా ఉచిత ఆరోగ్య శిబిరాలను నిర్వహించి వారి ఆరోగ్య సంరక్షణకు లయన్స్ క్లబ్ కట్టుబడి ఉంటుందని తెలిపారు.

పలువురు లయన్స్ సభ్యుల పాల్గొనిక

ఈ కార్యక్రమంలో క్లబ్ అధ్యక్షుడు లయన్ తారకేశ్ రావు, కార్యదర్శి లయన్ రామరాజు, కోశాధికారి లయన్ మోహన్‌తో పాటు లయన్ సాంబశివరావు, లయన్ పెద్ది శ్రీనివాస్, లయన్ సిద్దిపేట శ్రీనివాస్, లయన్ వెంకట్ రెడ్డి, లయన్ చంద్రబాబు, లయన్ వెంకటేశ్వరరావు, లయన్ శ్రీను, లయన్ శ్రావణ్, లయన్ రమేష్ తదితరులు పాల్గొన్నారు. వారు మున్సిపల్ పారిశుద్ధ్య కార్మికులకు స్వయంగా అల్పాహారం వడ్డించి అభినందనలు తెలిపారు.

సమాజ సేవే ధ్యేయంగా ముందుకు సాగుతున్న లయన్స్ క్లబ్ ఆఫ్ హైదరాబాద్ కుషాయిగూడ, మరోసారి సేవా కార్యక్రమం ద్వారా తన సామాజిక బాధ్యతను చాటుకుందని పలువురు అభిప్రాయపడ్డారు.